test-bjorng-bakki2

Norðurþing og TAA undirrita viljayfirlýsingu um álendurvinnslu á Bakka

Fri, 06 Mar 2026 10:32:58 GMT

Norðurþing og TAA

Norðurþing og Transatlantic Aluminum (TAA) hafa undirritað viljayfirlýsingu um að kanna möguleika á uppbyggingu álúrvinnsluverksmiðju á iðnaðarsvæðinu á Bakka. Verkefnið felur í sér gerð steypuskála fyrir endurunnið ál með allt að 90.000 tonna ársframleiðslu þegar fullum afköstum er náð og er gert ráð fyrir að framleiðslan verði m.a. notuð í tækni- og flugvélaiðnaði. TAA vinnur að verkefninu í samstarfi við Almex USA sem er sérfræðifyrirtæki í vinnslu á harðáli og búnaði því tengdu.

Samkvæmt viljayfirlýsingunni munu aðilar vinna saman að frumathugunum og mati á helstu þáttum tengdu verkefninu. Stefnt er að því að viljayfirlýsingin þróist yfir í lóðar- og hafnarsamning, að undangenginni jákvæðri hagkvæmniathugun sem áætlað er að ljúki í lok ágúst 2026. Verkefnið fellur vel að stefnu grænna iðngarða á Bakka þar sem framleiðslan byggir á endurvinnslu og lágmörkun kolefnisspors.

Viljayfirlýsing um þróun sjálfbærrar rafeldsneytisvinnslu á Bakka

Fri, 06 Mar 2026 10:29:22 GMT

Norðurþing og E-Valor

Norðurþing og E‑Valor ehf. hafa undirritað viljayfirlýsingu í tengslum við að kanna möguleika á uppbyggingu sjálfbærrar rafeldsneytisframleiðslu á iðnaðarsvæðinu á Bakka við Húsavík. Verkefnið, sem fyrirhugað er að þróa í þremur áföngum, miðar að framleiðslu allt að 100.000 tonna af rafeldsneyti á ári og fellur vel að markmiðum Bakka sem græns og sjálfbærs iðnaðarparks.

Viljayfirlýsingin kveður á um samstarf á meðan unnið er að forathugunum, meðal annars vegna orkuöflunar, flutningskerfa, hafnarmála, umhverfismats og annarra lykilþátta sem tengjast framkvæmdinni. Norðurþing mun styðja við verkefnið með því að veita aðgang að upplýsingum og vinna með viðeigandi stofnunum, á meðan E‑Valor framkvæmir ítarlega frumhönnun og þarfagreiningu.

E‑Valor hefur þegar fengið úthlutað lóð á Bakka. Stefnt er að því að lokaniðurstöður samkvæmt viljayfirlýsingunni liggi fyrir í september 2026.